رادارات سيجر تلقط جوز عيال صيع بيخمسوا بموتوسيكلات بشكمان مخروم

 

 رادارت سيجر الوطنيه والتى تم تصنيعها بإيد أحول صنايعيه ورا السلمه التحتانيه لقطت داك العصريه جوز عيال برماويه تخطوا الأقفاص الحدوديه بمكنه مصديه علشان يخمسوا فى الحديقه الوطنيه مما أثار عفره كتير يا عنيه.

وانتقلت الشرطه السيجراويه فى التو واللحظه إلى مكان الحادث بينما حاول المتسللين الزوغان وفطوا بالمكن بتاعهم بس على مين, الشرطه طلعت وراهم بأحدث الموتوسيكلات اللى شارينها بالقسط من محل شكوكو فى شارع الورش جنب محطة القطر اللى باع لهم 9 حتت مكن على ابوها بسعر مهاود واداهم استيكرات لميع كده كجدعنه منه.

واستطاعت الشرطه محاصرة العيال اللى طلعوا 5 انفار ب 7 موتوسيكلات لإن كان فيه عيال بتخمس أودام  الرادارات , حيث ان الرادار بيشوف اللى فى قفاه بس ومش بيشوف اللى قدامه ودى عبقريه فى التخطيط والتنفيذ والتطبيل لصاحب الفكره.

وهتقولى ازاى 5 عيال راكبين 7 موتوسيكلات , هقولك متاخدش فى بالك لإن التقرير طلع كده, وقد علمت جريدة نبض المصاطب من مصادر سريه انه كان فيه جوز موتسيكلات مرميه ملهومش ديه وواقعين فى الخيه جنب الميه ويومها الظابط بيت النيه إنه يلزقها فى أى قضيه معديه.

وبعد إذنكم يا جماعه تلموا من بعضكم خمستاشر جنيه لإننا كرمشنا لمصدرنا السرى جوز جنيهات وجيبناله كوباية شاى ب 3 معالق سكر وشاندوتش فول من ليفرفول وده خلى خزنه الجريده ع الحديده.

 وبعد محاصرة العيال زاغوا تانى علشان الظابط جاتله مكالمه من خطيبته اللى كانت زعلانه منه , ليه بقى , هقولكم , ما انتوا تموتوا فى اللت والعجن والنميمه, أمه مش  عاجبها ذوق خطيبته فى أى حاجه ومطرشمه منها وشايلاها على راسها وزاعقه وبتتلكك لها لإنها كانت عاوزاه ياخد لواحظ بنت خالته غوايش لإنها بت مقرشه وعليها فدانين طين حدا الكردون والقيراط بعد كام سنه هيبقى بالشئ الفلانى والعلانى  كمان ده غير الإيجار اللى عدى 40 ألف ملطوش فى السنه يعنى كل أول سنه هيقفش 80 ألف جنيه, بس يختى الواد متربس دماغه وقافش فى خطيبته ومش عاجبه بنت خالته اللى بيقول عليها هبله مع انها مش هبله أوى يعنى , واحنا من موقعنا هذا بننصحه بأمانه انه يتجوز بنت خالته ومش بننصحه بكده علشان الست والدته بعتتلنا شاندوتشات باميه بايته فيها حتتين لحمه محمرين بالسمنه البلدى وعليها لحسة قشطه مع خرطتين بسبوسه ريحتهم كانت قالبه مقر الجريده.

 

 المهم كل لما يحاصروا العيال يزوغوا منهم لحد ما جه أمين شرطه ناصح و إور واقترح انهم يجيبوا تقفيصات فراخ ويحطوا فيها كتاكيت ويقفلوا بيها مداخل الشوارع لإن العيال دول من برما ومش هيجيلهم قلب يدوسوا الكتاكيت.

وبالفعل تم القبض على العيال وتم تقليبهم فى 3 كراتين بيض وتم تسليمهم إلى السلطات والطحينه البرماويه حسب اتفاقية تبادل المتسللين حيث  تنص الاتفاقيه على تبادل المجرمين بعد تقليبهم والفرق يتسوى بالبيض او بالبانيه الغير متبل.

 كان معكم مراسلنا من موقع الحادث , بس مجابش صور علشان كان فيه عفره كتيره وهرجله وهو خاف ان موبايله يقع يتفشفش.