تماشياً مع رؤية طنطا 2033 أعلنت هيئة الترفيه والترفيس الطنطاويه عن انطلاق فعاليات حفل استفتاح واستلواح مراجيح سبرباى والتى تم تصميمها وتصنيعها وتغليفها على أيدى خبراء وصنايعيه من تل الحدادين بأجود الحدايد والبويات الموجوده فى محلات الششتاوي للحدايد والبويات بسبرباى.
وتم مراعاة عوامل الأمان فى تصميم قسم المراجيح وعمل مسافة 5 متر فراغ حوالين كل مرجيحه علشان ساعات العيال اللى بتتمرجح بتتزفلط من المرجيحه وتتنطر على الناس اللى واقفه تتفرج ولذلك تم عمل فراغ حماية للساده المشاهدين وتم التنبيه عليهم ميقربوش علشان ميتعوروش وميتخرشموش خرشمة مرموش وابو دهموش , وتم التنبيه عليهم برضه انهم ما ينادوش على اللى بيتمرجح بإسمه علشان بيتزاول وبيتلخبط وبيقع يتدئلج ويتكسر.

وبالنسبه للإحتياطات والإجراءات الطبيه تم التعاقد مع 3 حلاقين صحه لتجبير الكسور و3 ترزيه لتخييط الجروح ومع 4 قهوجيه للتعامل مع الجروح الخطيره بطريقة "اكبسها بن" ومع 7 حانوتيه للتعامل مع الحالات الخلصانه اللى مفيهاش رجا.

وعلى صعيا أخر , تم التعاقد مع الست الدايه ام حسانين للتعامل مع حالات الولاده الطارئه حيث ان هناك نسوان حوامل بتتوحم على المرجيحه.

وبناءً على توجيهات السيد سالم سليمان سلمان سلامه سليم سويلم زاهر زهير زهران ابو زهره مدير التخبيط الاستراتيجى وتروح - تم عمل حفره جنب كل مرجيحه لإن العيال بعد ما بتنزل من المرجيحه بتبقى مدروخه و بتحتاج ترجع فبدل ما يزروطوا الدنيا عملنالهم حفره.

وهدماً على توجيهات السيد نائب مدير المراجيح تم عمل مكافأه قدرها 7 جنيه وخرطة بسبوسه للعيل اللى هيشقلب المرجيحه 9 مرات وميقعش تتكسر رقبته وميرجعش بعد ما ينزل من المرجيحه.

وتم تقديم طلب عاجل للسيد مدير قسم النشان بإنه يبعد شويه عن المراجيح علشان طلق البندقيه ساعات بيفلت ويخزق عين العيال اللى بتتمرجح او الناس اللى واقفه تتفرج وقد رفض سيادته بكل بجاحه وشوح بإيده كدهوت وقال "ده مكانى وانا حاجز هنا من قبل ما انتوا تيجوا وده أكل عيشى وشرب شيشى وتجهيز نيشى ونتف ريشى ولبس خيشى ودى متجيشى" , ولكنه وعد بمعالجة المصابين من قسم المراجيح فى الوحده الطبيه الخاصه بقسم العيون والتى يديرها نخبه من الأطباء والذين يحملون أفضل الشهادات المزوره بدقه شديده والصادره من أرقى كليات الطب البيطرى فى العالم السفلى.

وقد دشنت ودشدشدت الهيئه منصه إلكترونيه لحجز دورك فى المراجيح وبعد الحجز والدفع ستتسلم مجموعة أرقام تسلسليه مشفره وهذه الأرقام تبلها وتشرب شوربتها لإنك لازم تقطع تذكره من البلطجى اللى واقف قدام المرجيحه وإلا هيخلى المطواه تزغرط فى وشك وقفاك وقفا اللى واقف وراك وقفا اللى واقف يستناك فالأحسن لك تشترى نفسك ونفس اللى معاك.