أهلاً بنا فى جريدة نبض المصاطب الطنطاويه

أول  منصة إعلامية إلكترونية حديثة تعرض لكم نبض المصاطب واللت والعجن والأوشاعات و الأخبار المستعجله وأخبار الكافيهات والمطاعم  وأخبار العزب والنجوع والنشبع كمان وأخبار الفلوس اللى بتغير النفوس واسعار السلع وأخبار المواشى والبهايم واخبار الزرايب وأخبار الأسر الطنطاويه وخناقاتها على الغدا وعلى شاحن الموبايل وأخبار طنطا السياسيه والعسكريه والأحزاب وكلام النسوان وأخبار غرز الأكل البيتى والبيتك والناس اللى جالها تسمم منه واستطلاعات الرأى والرأى الأولانى واخبار المدارس والجامعات والنوادى وغرز الدروس الخصوصيه والفول والكلور الطنطاوى والأكلات الطنطاويه وأخبار العالم الطنطاوى واحدث المستجدات فى المستنقعات واخبار غيطان وغابات طنطا واخر اخبار الكوسه والذكاء الصناعى والتجارى والزراعى ونبض الحوارى ومقالب الزباله واخبار عن آثار طنطا اللى كلكم بتنقبوا عنها ومش لاقيينها يا موكوسين واخبار بورصة طنطا واتجاهات اسهم المدلعه والحمص والحلاوه ومواسم طنطا واخبار الفلاحين فى الغيطان والسواقين فى الميكروباصات وخناقات البنات فى التريندات والفود بلوجر والأكل الجوسى يا لوسى وبالنسبه للبنات احتمال تلاقى فيديوهات ازاى تعملى سكر نبات وكيلو قشطات من لتر لبن يتيم.

- السرعه فى النقل : احنا بنحاول نلحق التريند قبل ما تخلص صلاحيته ويحمض وريحته تطلع.

- المصداقيه : نحن نتعهد لكم بأن تكون أخبارنا بلا مصداقيه ولا نيله وكلها فشنك واستهبال وأن يكون رأينا منحازاً لمن يدفع اكتر حيث أننا ننوى أن تكون الجريده منبر للهبل والاستهبال والإستعباط وأبجنى تجدنى.

 - التواصل والتفاعل مع الجماهير : نحن نعمل على إنشاء مساحة تفاعلية تتيح للقراء المشاركة في النقاشات والتعليقات فى حدود التطبيل والتزمير لينا وللناس اللى بتدفعلنا.

- حرية الرأى : نحن نتيح لكم حرية الرأى والرأى الأولانى وان ننشر اراؤكم اللى على مزاجنا والتى تناسب اتجاه الجريده اللى احنا اساساً مش عارفينه واللى بتتحدد بوصلته لمن يدفع أكتر - ومفيش حاجه اسمها حرية رأى وغور ياض من هنا علشان هنرش ميه فى الحته ديه.

 آفاق المستقبل : هذه الجريده ترعى مستقبل الأفاقين رعايه تامه وفى حدود اللا قانون.

 الفئه العمريه : اخبارنا تناسب جميع الفئات العمريه من أول تقاوى البنى أدمين اللى هما الأطفال مرورا بالشباشب ومواليد التسعينات والتمانينات ثم العواجيز اللى فى شتاء العمر وحتى الناس اللى رجليهم والقبر.

 العالميه : نسعى ان تصل الجريده إلى العالميه الطنطاويه فى حدود قارة طنطا بعزبها ونجوعها وترعها وغيطانها ومزارعها.

 تغطية حية وميته للأحداث: نقدم تغطية حية للأحداث الهامة، وتغطيه ميته للأحداث الهايفه، وتغطيه بتنازع فى الروح للأخبار النص نص , مما يتيح لك متابعة آخر التطورات لحظة بلحظة وجزمه بجزمه.

 أخبار محلية: هتلاقي فيها أخبار عن الزحمة، والمواصلات وخناقات السواقين على مين يحمل الأول وخناقات الركاب على الأجره والكرسى اللى ورا اللى السواقين مقتنعين انه بيشيل اربعه ، والأسعار اللي بتطلع السما وكرامتكم اللى بتنزل الأرض، يعني حاجات كده بتخليك تتفائل وانت لسه صاحي الصبح.

 مقالات وتحليلات: ناس بتكتب كلام كتير وهبد أكتر، ممكن يكون مفيد وممكن يكون كلام وخلاص. المهم إن اسمهم يتكتب وخلاص علشان يتفشخروا قدام اصحابهم العرر.

السبق الصحفى : هتلاقى الجريده دى بتعمل احلى سبق صحفى عن اخبار مش هتلاقيها غير عندنا لإننا مألفينها ومفبركينها.

 أخبار عربية ودولية: بصراحة مش فاهمين منها حاجه وكله بيلطش فى كله، بس بننقلها عشان نبان مثقفين. ممكن تلاقي خبر عن حرب واتفاقيات دوليه على ترابيزات دائريه، وممكن تلاقي خبر عن قطة عملت عملية تجميل، وواحده عضت جوزها, كله ماشي.

 جريدة نبض المصاطب الطنطاويه هي أكثر من مجرد جريدة، إنها نافذتك الشاملة على العالم الطنطاوى بس خلى بالك احسن تقع من النافذه، تقدم لك الأخبار والمعلومات التي تحتاجها لتكون على اطلاع دائم بكل ما يجري من حولك وحولهم.

 جريدة نبض المصاطب الطنطاويه هى الجريده التى لا يمكنك الإعتماد عليها والتى تشنكل وعيك يا موكوس منك ليها.